Сопственикот на Комуникација.мк останува во притвор, земал мито за лажни вработувања

Добивај вести на Viber

30-дневен притвор му е изречен на Бобан Насев(31), сопственикот на информативниот веб портал Комуникација.мк кој вчера беше уапсен од полицијата. Насев се товари за повеќе кривични дела. Ветувал вработувања во министерста, во НБРМ, во повеќе владини институции, а давал и понуди за евтини социјални станови при што барал мито. Ова се само дел од делата за кои се товари, а како што информираат од Министерството за внатрешни работи, Насев е приведен откако го пријавиле пет оштетени граѓани од различни градови. Тој се преставувал како висок владин функционер, па преку лажните ветувања за државни вработувања и станови успеал да изнуди околу 21.000 евра, но од полицијата се сомневаат дека бројката на оштетени граѓани е поголема. Во случаите кога оштетените немале пари, како што стои во полицискиот извештај, оштетените му плаќале на рати или во стока. Откако штипската полиција го повикала Насев на информативен разговор, тој во просториите на полицијата бил препознаен од страна на граѓаните кои го пријавиле. Од МВР информираат дека во полиција кажал дека ќе го користи правото на молчење. Како што посочуваат од МВР, Насев бил уверлив во своите тврдења, а ги повикаа сите граѓани кои ќе препознаат дека биле злоупотребени да го пријават во полиција. Насев и претходно бил евидентиран во МВР бидејќи има сторено повеќе дела измама и има над дваесет кривични пријави. За дел од нив, од полицијата соопштуваат дека и претходно лежел во затвор.