Совет за етика: Алсат М го прекрши кодексот на новинари за случајот со „МХЕ Тополки“

Добивај вести на Viber

Советот за етика во медиумите смета дека телевизијата Алсат М со прилогот насловен „Службеници кои се посомневале за „Топoлки“ на Анѓушев завршиле зад решетки“ го прекршила Кодексот на новинарите на Македoнија.

Жалбата ја поднела лично компанијата  „МХЕ Тополки“ со навод дека во прилогот се известува неточно и нефер и дека ја немало втората страна. Според жалителот во објавената содржина недвосмислено се имплицира и се инсинуира дека „Друштвото МХЕ Тополки” е поврзано со истражни и судски процеси, кои што во никој случај не се ниту блиски до работата на друштвото. Од „Тополки” посочуваат дека авторот само навел процеси и активности без да се следи прецизниот календар на случувања и дека во ниту еден момент не побарал изјава од Друштвото.

Од Алсат М телевизија одговориле дека категорично ја отфрлаат жалбата како неоснована, зашто како што посочиле, во текстот биле запазени сите новинарски и етички стандарди.

Станувало збор за серијал прилози на истата тема и дека нивната содржина била поткрепена со повеќе јавно објавени документи со обележани датуми и со  тек на случувањата. Телевизијата ги отфрла и забелешките на  МХЕ Тополки” дека Алсат инсинуирал поврзаност на предметот „Шпански скали” и апсењето на двајцата службеници, кои учествувале во подготвувањето на документот испратен до Државното правобранителство со кој се бара правно мислење за дадениот закуп на државното земјиште.

Комисијата за жалби одлучила дека жалбата на МХЕ Тополки е основана и дека Кодексот на новинарите на Македонија е прекршен во членот 1.

„Комисијата заклучи дека прилогот на Алсат-М во најголем дел е професионален и етички, но дека сепак авторот отстапил од основното новинарско правило, да побара став од сите засегнати страни, во случајов, и од фирмата „МХЕ Тополки”. Со тоа, медиумот ќе обезбедел целосна и уште пообјективна информација, наместо да смета дека е доволно да се обрати само до Владата, која е само една од страните во новинарскиот производ.