Спасовски и Милков со повик да не се блокираат патишта за Бугарите на 4 февруари

Добивај вести на Viber

Министерот за внатрешни работи Оливер Спасовски им порача на групите кои се организираат за да го блокираат пристигнувањето на бугарски државјани кои сакаат на 4 феврураи да се поклонат на гробот на Гоце Делчев, да не ги блокираат патиштата кои водат кон Скопје.

- Нема никаква потреба од какво било организирање на граѓаните за блокади на патиштата или ноќни стражи на денот на чествувањето на роденденот на Гоце Делчев, затоа што тука се институциите на системот, изјави денеска министерот за внатрешни работи Оливер Спасовски.

На социјалните мрежи објавен е повик упатен до граѓаните на 4 февруари да ја блокираат патарината Куманово – Скопје. Спасовски повика на мирно, достоинствено чествување, а државата со безбедносните служби ќе направи се што е потребно за да се обезбедат мирни услови.

Според сознанијата на министерот, нема да биде многу голем бројот на оние кои се организираат и сакаат да дојдат.

– Апсолутно нема да дозволам како МВР понижување на македонскиот народ и држава, најмалку да не понижи некој кој доаѓа од надвор. Ние сме народ кој е гостопримлив, кој знае да укаже чест и почит, но таа чест и почит мора да ни биде возвратена. Нема да дозволиме дома некој да ни дојде за да не понижува. Во тој дел институциите работат и прибираат информации, наведе Спасовски во емисијата „Утрински печат“.

Бугарија пак ќе бара со нота да им се обезбеди пристап на Бугарите што патуваат во Македонија за да се поклонат на споменикот на Гоце Делчев на 4 февруари. На настанот ќе учествуваат и претставници на бугарската амбасада, а ова  го соопшти бугарскиот министер за надворешни работи Николај Милков на брифинг.

– На социјалните мрежи во Северна Македонија се организираат блокади на патот кон Скопје против бугарските посетители. Клучно е да се обезбеди безбедност на Бугарите таму. Обезбедувањето непречено оддавање почит на 4 февруари е елемент на тоа. Сакаме да постигнеме деескалација. Ние не бегаме од таков дијалог. Нашиот премиер ќе има телефонски разговор со македонскиот премиер Ковачевски, а еден од главните елементи ќе биде обезбедувањето на безбедноста на бугарските граѓани воопшто, како и за тоа што ќе се случи на 4 февруари. Ние се залагаме за таква деескалација, не треба да се вратиме на ситуацијата пред една недела бидејќи тоа би било конкретизирање на репресијата – посочи Милков.