СПИСОКОТ СО ФИРМИТЕ НЕПЛАЌАЧИ УШТЕ НЕ Е ЈАВНО ОБЈАВЕН - на потег е новиот владин генерален секретар Мухамед Зекири

Добивај вести на Viber

Наместо за плати кај работниците, дури 86 илјади евра државна помош завршија кај нивните работодавачи, кои ги задржаа на своите сметки. Такво непримерно поведение во октомври покажале 179 газди, а извисија 338 работници. Оваа мерка е од четвртиот владин сет за помош на стопанството, но се покажа дека има фирми кои сметаат дека државните пари не биле за плати на работниците, туку за нивните џебови. 

Директорката на Управата за јавни приходи, Сања Лукаревска, вчера најави дека уште одма списокот со овие газди ќе го испрати до Генералниот секретаријат на Владата. Таму сега директорува Мухамед Зекири, кој е избран на ова место од новата Влада, откако претходно на позицијата беше Драги Рашковски.

Генералниот секретаријат, пак, треба што поскоро да го објави јавно списокот со овие газди-неплаќачи.

Вчера, но и денес утрово, на веб страницата на Владата, барем на видливо место, списокот се уште го нема. Останува да следиме дали во текот на денешниот ден ќе ги видиме јавно имињата на бесрамните газди, како што доликува на една транспарентна власт.

Лукаревска вчера беше децидна дека овој список нема да се промени, односно сите овие недисциплинирани фирми нема да се тргнат од оваа јавна листа дури и ако во меѓувреме ги исплатат своите обврски за плати кон работниците.

Инаку, УЈП сите овие фирми, откако првично ќе ги опомени, ќе спроведе постапки за присилна наплата на платите, потоа, ќе им испрати свои инспектори, кои заедно со трудовите инспектори ќе го чешлаат работењето на овие компании, врз нив ќе има прекршочни санкции, а нивните имиња ќе бидат испратени и до Јавното обвинителство, што значи дека за нив ќе има и кривично гонење. 

Глобата што ќе ја платат овие компании ќе изнесува од 500 до 1.000 евра за микро компаниите, па до меѓу 1.000 и 10.000 евра за големите компании. 

„Секој кој го прекршил законот ќе одговара, можеби санкциите се премлаки, но ние како УЈП укажуваме дека спроведувањето на присилната наплата се одвива сега, а тоа и ќе продолжи. Исто така, дадени им се налози на инспекторите од УЈП и трудовите инспектори - да го испитаат и целото работење на овие компании. Потребни се построги мерки, но очекуваме и дека оваа јавно објавување на газдите неплаќачи ќе вроди плод“, рече Лукаревска на вчерашната прес конференција.

Директорката на УЈП обелодени и дека некои од газдите неплаќачи за октомври, не ја исполниле таа своја обврска ни за периодот април, мај и јуни, кога дел од фирмите што зедоа државна помош за исплата на плати, исто така не им платија на работниците.

Н.Н.Ф.