Српска градежна фирма стана четврт најголем акционер во „Гранит“

Добивај вести на Viber

Српската градежна компанија за изградба на патишта и автопати Бард - Коп Доо од Белград стана четврт најголем сопственик на акции во храдежниот гигант „Гранит“. Ова е последната информација што е објавена од страна на Централниот депозитар на хартии од вредност по интензивните тргувања со акциите на „Гранит“ во изминатиот период.

Законски е дозволено единствено објавување на сопствениците на капитал под 5 отсто во трговските друштва, а со последната промена од понеделникот, евидентирано е дека Бард - Коп Доо е сопственик на 5,06 отсто од акциите. Останатите сопственици со удели од над 5 проценти се уште самото градежно друштво со 9,81 отсто, Зоран Милковски со 8,90 и Ивана Милковска - Симева со 8,84 проценти. Уделот на странските правни лица во „Гранит “ е 6,56 отсто и нив ги има вкупно осум. Вкупниот број на акционери е 4.028 физички и правни лица - домашни и странски.

Според она што може да се пребара, станува збор за мало претпријатие од Белград со постојан раст на приходите и добивката, како и на вработените, кои се 45 на број во 2021. Основано е во 2019, а добивката минатата година била нешто повеќе од 600.000 евра.

„Гранит“ во периодот Јануари - септември оствари вкупни приходи од 57 милиони евра и зголемување за 4 отсто. Добивката по првите три квартали од годинава е 1,35 милиони евра.

Изминатиот период интензивно се тргуваше со акциите на „Гранит“ на пазарот со блок трансакции, како и оној класичниот. На 25 октомври се реализираше уште една блок трансакција, во која беа купени 1,41 отсто од акциите на компанијата. Како што соопшти Берзата, цената по која се продала една акција изнесувала 1.450 денари, или за купени 43.200 акции, биле платени 62,6 милиони денари, односно малку повеќе од еден милиони евра.

Претходно дотогашниот  најголем институционален инвеститор во компанијата Сава пензиски фонд одлучи да ги продаде своите 7,5 отсто од акциите, за 5,6 милиони евра. Се уште нема јавна потврда за тоа кои се новите сопственици на овие акции.

На почетокот на октомври вкупен промет за пет трговски дена со тргување на акциите на „Гранит“ изнесуваше речиси 2 милиони евра.