Српскиот министер за економија поднесе оставка, Србија оди на избори?

Добивај вести на Viber

Српскиот министер за економија Саша Радуловиќ поднесе оставка на функцијата, а како причина го наведе недостигот на политичка волја за спроведување на реформи. Изминатите денови Радуловиќ најави дека доколку веднаш не поминат системските закони, особено законот за приватизација и стечај, тоа е сигурен знак дека Србија се откажува од реформите и оди на избори. „Доколку тие реформи не се спроведат, нема поента да останам во Владата“, изјавил Радуловиќ. Сега веќе поранешниот министер за економија на Србија живеел и работел во Германија, Канада и САД, а во Србија се вратил во 2005-тата година. По враќањето работел како консултант, финансиски експерт за стечај и берза, а бил и стечаен управник на 14 претпријатија. Во август 2013-та ја прифати поканата на потпретседателот на Владата Александар Вучиќ, да ја преземе министерската функција како непартиски кадар. Токму Вучиќ на вонредното изборно собрание на неговата Српска напредна партија (СНС) најави дека на Претседателството на партијата утре ќе му предложи распишување на вонредни парламентарни избори и со тоа ги потврди проценките на Радуловиќ. „Дојде време да положиме сметки. Завршивме многу добра работа и тое е една од клучните причини, бидејќи мислиме дека можеме и подобро и побрзо во иднина“, истакна Вучиќ. Српската напредна партија на Вучиќ има најголем број пратеници во актуелниот состав на српскиот Парламент - 64, додека нејзиниот коалиционен партнер Социјалистичката партија на Србија, предводена од премиерот Ивица Дачиќ, има само 25 пратеници.