Српскиот премиер ќе присуствува на церемонијата по повод 20 години од масакрот во Сребреница

Добивај вести на Viber

Српскиот премиер Александар Вучиќ ќе присуствува на церемонијата за одбележување на годишнината од масакрот во Сребреница, објави „Ројтерс“. На 11 јули се навршуваат 20 години од масакрот на околу 8.000 муслимански мажи и момчиња, извршен од силите на босанските Срби и е опишан од меѓународната правда како геноцид.

„Време е да покажеме дека сме подготвени за помирување, дека сме подготвени да се поклониме пред жртвите“, изјавил пред новинарите Вучиќ.

„Српската влада одлучи јас да ја претставувам Србија на 11 јули во Сребреница“, додал тој.

Гласање во Советот за безбедност на ОН за осуда на масакрот во Сребреница како геноцид беше одложено и треба да се одржи денеска, иако Велика Британија и САД се обидуваат да ја убедат Русија да не става вето, тврдат дипломатски извори на „Ројтерс“.

Присуството на Вучиќ на церемониите на 11 јули во Босна ќе биде во рамките за помирување меѓу поранешните југословенски републики по војните во 90-тите години, кога загинаа над 135 000 луѓе.

Поранешниот српски претседател Борис Тадиќ присуствуваше на 15-годишнината во 2010 година, но Вучиќ е поблизок до идеологијата за Голема Србија, која во голема мера предизвика крвопролевање, коментира агенцијата.

Тогаш српските власти признаа дека она што се случило е „огромно злосторство“ и го осудија, како што настојувале кон интеграција со Западот, но Белград така и не го утврди масакрот во Сребреница како геноцид.

Вучиќ изјавил дека бил уверен дека резолуцијата на ОН нема да биде примена во нејзината сегашна форма. Според премиерот документот е „понижувачки“ за Србија. Тој им се заблагодари на Кина и Русија што се спротивставиле на резолуцијата.

„Морам да признаам дека руските партнери не бараат ништо во замена“, додал тој.