Стевчо Јакимовски: ДУИ и Талат Џафери му се одмаздуваат на СДСМ и Заев
Објавено во: Македонија 14 Јуни, 2020
Претседателот на ГРОМ, Стевчо Јакимовски, тврди дека спикерот на Собранието, Талат Џафери, не сака да одреди нов датум за предвремените парламентарни избори затоа што ДУИ во моментов му се реваншира на СДСМ поради тоа што, како што вели тој, овие не сакаат да коалицираат со нив во евентуалната следна Влада.
„Не знам што очекува Заев и СДСМ од ДУИ во ваква ситуација кога веќе се гледаат низ нишан. СДСМ направи коалиција со БЕСА а на Ахмети му порачаа дека би било многу здраво за него да оди во опозиција.
Дури сега сезнајкото од Струмица ќе дознае „како муса дере јарца“, односно сега ДУИ ќе му врати со сета жестина. Веќе му врати преку Уставниот суд со поништување на уредбите на владата, со одлуката да не може собранието да се свика повторно а еве сега почнуваат да го печат на тивко со датумот за избори. Затоа денес Талат ги упати на консензус. Односно повторно ДУИ става до знаење дека ни една крупна одлука не може да се донесе без нив. Ако во 2015, 2016 и 2017 година по изборот на малцинската влада го закопаа Никола Груевски сега ДУИ истото ќе му го направи и на Заев, зошто има помалку причини за обзири кон СДСМ во однос на ВМРО ДПМНЕ“, напиша меѓудругото поранешниот градоначалник на Карпош на својот профил на Фејсбук.
Според Јакимовски, а како што и самиот Џафери најави денеска, ќе се чека договор помеѓу претседателите на СДСМ и ВМРО-ДПМНЕ - Зоран Заев и Христијан Мицкоски. Денеска Мицкоски, иако е истечена вонредната состојба и роковите за избори продолжуваат, рече дека не ги прифаќа предозите на Заев за избори на 5, односно 8 јули, а како што вели Јакимовски, Заев и СДСМ се спремни за избори и без ВМРО-ДПМНЕ, но затоа пак Оливер Дерковски, претседателот на ДИк од редовите на опозицијата, не им се јавува на останатите членови на комисијата и не свикува седница.