Стојанов: Бугарија знае што сака од Македонија, но Софија не знае што сака од себе

Добивај вести на Viber

Eкс бугарскиот претседател Петар Стојанов за бТВ оцени дека во моментов треба да се излезе од историјата и конечно треба во Бугарија да се постигне консензус дали имало фашизам или не, затоа што, како што нагласи, сите сме учеле дека во Бугарија имало „монархофашизам“.

Тој повика да се читаат историчарите од тој период или познатиот интелектуалец Цветан Тодоров кој го кажал истото, јави дописникот на МИА од Софија. 

„Бугарија знае што сака од Северна Македонија, но Софија не знае што сака од себе. Немаме една позиција и не знаеме за што зборуваме“, вели Стојанов.

Тој ја наведе за пример Втората балканска војна во 1913 година, кога бугарска воена единица казнила неколку села во тиквешкиот регион во кои живееле Срби.

Тој се обрати до искрените претставници на бугарските патриоти, посочувајќи им дека Бугарија не се подготвува да и објави војна на Северна Македонија, туку напротив, заедно со неа да биде членка на Европската Унија.

Потсети дека по 1945 година Македонија станува република во Југославија рамноправна со Хрватска и Словенија.

„Проблемот е што Бугарија во изминатите 30 години нема оформено една позиција во однос на односите со РСМ. Треба да го промениме нашиот тон за односите кон граѓаните и политичарите на Северна Македонија. Нема зошто бугарските новинари да го употребуваат изразот „ќе ги оставиме да поцимолат пред портите на ЕУ“ и „треба да дојдат и да ни ја бакнат раката“ и таквиот патерналистички тон треба веднаш да биде запрен“, потенцираше Стојанов.

На 18 месецов, бугарскиот премиер, Кирил Петков доаѓа во посета на Македонија.