Странците ќе навалат на куќи во Македонија, кога ќе биде јасно дека влегуваме во НАТО!

Добивај вести на Viber

По владината одлука секој странец кој ќе инвестира најмалку 400.000 еврада добие и трајно жителство во Македонија, што би требало да го поттикне да инвестира и во недвижности, се огласија и странските инвеститори кои веќе работат во земјава. Велат дека мерката нема да предизвика посебен интерес за вложување оти пасошот и не бил клучна работа по која тие се водат кога одлучуваат каде ќе инвестираат Соња Јованова Наумовска Странските инвеститори во земјава ја поздравуваат мерката на Владата но потенцираат дека државјанството во една земја не е пресудно за тие да одлучат да инвестираат или пак да купат куќа или стан во земјава. „Овие мерки се симболични од повеќе аспекти иако во крајна линија сепак е добар гест на Владата кон потенцијалните странски инвеститори. За нас сепак, најважна е транспарентноста и предвидливоста на економската рамка, слободното движење на капиталот, довербата во институциите и даночниот систем. Како Совет на странски инвеститори ние ги поддржуваме сите владини напори за постојано подобрување на бизнис срединатаво насока на привлекување на повеќе странски инвеститори а овие мерки на некој начин се уште еден чекор кон подобрување на бизнис средината“, вели Даниел Сас, главен извршен директор на Македонски Телеком и претседател на Советот на странски инвеститори. За еден странски инвеститор да вложи во некоја земја најважна му е бизнис климата и политичката состојба во државата. Владината мерка, на некој начин може да биде придобивка за оние што веќе работат во земјава , потенцираат странските бизнисмени. „Странските инвеститори и пред либерализацијата на пазарот на недвижнини во Македонија можеа да купат недвижен имот во земјава, со основање на локална компанија, она што обично го прават од даночни причини. За физички странски лица, сепак, можноста да се купи стан или куќа сега е многу подобрена иако за жал нашето искуство покажува дека тие се соочуваат со проблеми при нивно користење токму поради привремената дозвола за престој. Сепак, клучен фактор за секој странски државјанин да купи имот се заснова на веројатноста Македонија да стане членка на ЕУ и НАТО“, објаснува Питер Рот, генерален директор на Соравија и член на Советот на странски инвеститори. Иако државјаните од земјите од Европската унија веќе пет години имаат одврзани раце да купуваат куќи и станови во земјава, тие ретко се среќаваат како сопственици. Според пресметките на агенциите за недвижности, едвај 1% од куќите и становите се во сопственост на странски државјани. Агентите за недвижности тврдат дека во земјава, куќи и станови купуваат само домашни лица или македонските иселеници, оти Македонија не била атрактивна земја за странци да купуваат станови и куќи. “За деловен простор можеби им се исплати да купат оти имаат и некои бенефити и ослободувања, но не гледам причина зошто некој Германец или Французин би зел државјанство во земјава за да купи имот. Може само да накалемиме луѓе кои бегаат од некои закони да можат да најдат засолниште во земјава. Друго беше еуфоријата во Бугарија пред неколку години, таму купуваа пензионерите од ЕУ кои начекаа евтини станови покрај море. Странците прават споредби и пресметки, така што дисбалансот на цените, на пример, во Охрид и во Бугарија е јасно видлив“, вели Сашо Поп Илиев, од агенцијата за недвижности Хепинес.