Струмица е жариште на корона: Се прави епидемиолошко мапирање во градот и се ангажирани сите лекари, па дури и полицијата

Добивај вести на Viber

Во последниве неколку денови, по Скопје, Струмица е вториот град кој претставува жариште на корона вирусот. Директорот на струмичкиот Центар за јавно здравје, д-р. Петре Витанов, во изјава за Фактор вели дека недисциплината на народот го урива здравствениот систем и за жал и покрај големиот број нови позитивни на ковид, во Струмица се уште има одреден процент граѓани кои не веруваат дека вирусот постои.

-Во моментов во Струмица се врши епидемиолошко мапирање, односно се бараат позитивните случаи, како и нивните контакти за да можеме да ги изолираме и да ја ставиме ситуацијата под контрола. Ова е исклучително тежок процес, бидејќи се кријат, не даваат точни броеви, па во многу случаи бараме асистенција и од полицијата, вели д-р. Витанов.

Смета дека главни фактори за високиот број на позитивни граѓани на ковид во нивниот град се непослушноста, недисциплината, непочитувањето на протоколите. Вели дека не само клубот „Аватар“ ја направи штетата, ниската свест на граѓаните за опасноста од ширењето на корона вирусот го дадоа целосниот резултат.

-Градот е целосно раздвижен. По една долга стабилна епидемиолошка слика, кога имавме само по 2-3 позитивни, струмичани велеа, „ние немаме, ние немаме“. Е сега тоа навистина ни се удри од глава. Луѓето се премногу опуштени. За жал, па и уште е така. Одреден процент сметаат дека сето ова се теории на заговор, но кога завршуваат на инфективните одделенија, гледаат дека не е така, потенцира д-р. Витанов.

Истовремено истакнува дека секаде низ Македонија болничките капацитети забрзано се полнат, па таков е и случајот во струмичката болница, каде е направено преместување на некои одделенија за да се создадат уште места за хоспитализирање на пациенти болни од ковид.