Студенти ќе изработуваат бизнис план со енергетска ефикасност

Добивај вести на Viber

Да се изработат бизнис планови во кои приоритет да имаат решенија за енергетска ефикасност - ова ќе биде задачата за студентите од економските и техничките факултети на конкурсот што ќе биде ојавен денеска. На него ќе можат да се пријават студентите од сите години, во форма на тимови од минимум две и максимум шест лица. Натпреварот за изработка на најдобар бизнис план е дел од активностите во рамките на Платформата за енергетска ефикасност што ја организираат ЕВН и Министерството за економија. „Енергетската ефикасност е клучна за зголемување на конкурентноста на компаниите на домашните и странските пазари, но и за подобрување на продуктивноста и оптимизацијата на трошоците. Освен редовните програми за креирање на развој во овој сегмент дополнително ќе придонесат и средствата од кредитната линија на ЕБОР од 75 милиони евра за земјите од Западен Балкан, наменети токму за енергетска ефикасност“, истакна министерот за економија Ваљон Сарачини. Доставените решенија од страна на студентите ќе ги разгледува стручна комисија. Најдобрите три проекти ќе бидат наградени со парични награди во вредност од 30.000, 18.000 и 9.000 денари. „Како енергетска компанија ние работиме интензивно на примената на енергетската ефикасност, особено во реалниот сектор. Но, за да имаме поголема практична примена неопходна е едукација, особено кај најмладите кои во иднина ќе бидат носители на развојот во економијата. Затоа овој натпревар е важен, бидејќи ќе отвори една нова димензија на размислување која треба да стане редовна пракса во следниот период“, изјави Вернер Хенгст, претседател на Управниот одбор на ЕВН. Министерството за економија и ЕВН Македонија во 2012 година ја започнаа „Платформата за Енергетска ефикасност“, а целта беше подигнување на свеста и примената на енергетска ефикасност пред се во реалниот сектор. Во рамките на оваа платформа се одржа едукативна работилница за медиумите и за компаниите. Според последните податоци над 30 отсто од компаниите веќе применуваат енергетски ефикасни технологии.