Судијката од „бомбите“ сепак нема да биде изземена

Добивај вести на Viber

Од Основниот суд Скопје 1 соопштија дека е одбиено барањето на Специјалното јавно обвинителство за изземање на судијката Лидија Петровска, која е назначена да постапува по обвинение на СЈО.

Таа треба да суди по првото обвинение на СЈО, во кое кривично се гонат седуммина вработени во УБК на чело со поранешниот началник на Петтата управа на УБК, Горан Грујовски. 

„Претседателот на Основен суд Скопје 1 – Скопје донесе решение со кое барањето се одбива поради тоа што не се основани причините за изземање на судијата кои СЈО ги навело во своето барање“ - стои во соопштението.

СЈО го поднесе ова барање откако  Петровска ги врати доказите за обвинението затоа што немале доставено акт за декласификација на документацијата.

СЈО поднесе барање за изземање на судија, затоа што постојат околности кои предизвикуваат сомневање во нејзината непристрасност во донесување на одлука, од причини што истата судијка се јавува во содржината на јавно објавените незаконски прислушувани разговори. 

Петровска беше спомената во „бомбите“ што ги објави опозицијата, од нејзината колешка Софија Лаличиќ, која на тогашниот директор на УБК, Сашо Мијалков му објаснува како Петровска и подарувала накит „сваровски“ на претседателката на Кривичниот суд, Лидија Неделкова.