Добивај вести на Viber
Индикатор дека има бранувања во акционерската структура е тоа што истовремено односно во ист ден со објавата на забраната некој акционер плати 100.000 евра и купи 1,28 отсто од акциите со право на глас во таа компанија. Тоа значи дека некој заинтересиран нов или постоечки акционер го зајакнува своето влијание. Дали некој подготвува преварт или некој се плаши од преврат?
„Скопски пазар“ доби времена мерка со која му се забранува да купува сопствени акции на Македонската берза, соопшти таа компанија. Имено, забраната за купување е од времен карактер и е издадена од скопскиот Основен суд 2. Станува збор за спор во кој тужител е прилепската компанија „Современ дом“, а која побара и добила времена мерка со која на „Скопски пазар“ му се забранува да купува сопствени акции. Таа времена мерка ќе биде на сила се до правосилна пресуда во овој спор. Повеќе детали за судскиот спор засега нема и „Скопски пазар“ досега иако котира на берзата не објавил ценовно чувствителна информација во која соопштил дека е тужена страна,а дека тужителот барал да се достави времена забрана да купува сопствени акции.
Многу е симптоматично тоа што истовремено со објавата на оваа ценовно чувствителна информација денеска во блок трансакција беа истргувани 1,13 отсто од акциите со право на глас. Односно во една блок трансакција некој купувач плати 100.000 евра за 808 акции со право на глас. Реално тоа се 1,28 отсто од акциите со право на глас во таа голема скопска трговска компанија која ги поседува сите зелени и отворени пазари во Скопје, а поседува и мрежа од големи супермаркети и трговски центар.
Во акционерската структура „Скопски пазар“ има 70.937 акции со право на глас и 14.629 приоритетни акции кои носат право на дивиденда, но немаат право на глас. Од акциите со рпаво на глас во сопствен откуп на „Скопски пазар“ се вкупно 7.971 акција кои со тоа го губат правото на глас, што значи дека одлуките на собрание на акционери се носат со мнозинство од вкупно 62.966 обични акции. Најголеми поединечни акционери во таа голема трговска компанија се Сашо Давитковски со 11,87 отсто од обичните акции и неговата мајка Тодорка Давитковска која поседува 11,36 отсто од акциите со право на глас.
Само за потсетување, како што веќе
пишувавме, во „Скопски пазар“ се случуваа турбуленции кога група мали акционери побара на акционерско собрание да се стави точка за отчет на менаџерите, но по тоа не излезе информација за тоа дали одлуката била разгледувана или воопшто не била ставена на гласање. Воедно во април „Скопски пазар“ беше актуелен и по тоа што најави дека има купувач на малцински пакет негови акции за кои извесна скопска фирма „Масон инженеринг“ би платила три пол пати повеќе пари за акции од цената што за нив би ја платила на берзата.
Досега нема објава за тоа дали „Скопски пазар“ покрена постапка пред КХВ за приватна понуда за познат купувач т.е. за „Масон Инженеринг“.
Р.Ф.