Тачи: Србија практично го призна Косово

Добивај вести на Viber

Србија практично ја призна Република Косово - нејзините граници, документи, изборите и законодавството. Ова е начинот - чекор по чекор да се дојде до признавањето на независноста. Формалното признавање ќе се случи за време на евроинтеграциите.

Тоа, го изјавил косовскиот министер за надворешни работи, Хашим Тачи за хрватскиот весник „Вечерњи лист“.

Според него, владата во Приштина ќе ги исполни сите обврски од договорот во Брисел меѓу властите во Белград и Косово, бидејќи тие го поддржуваат Уставот и територијалниот интегритет на земјата.

„Јас немам никакво сомневање дека на крајот од овој процес Косово ќе ја отвори својата дипломатска мисија - амбасада во Белград и ќе имаме добри односи“, изјавил Хашим Тачи и појасни: „Дали тоа ќе се случи во рамките на овој или следниот мандат - сето тоа зависи од Србија и колку е голема нејзината желба да ја прифати реалноста, бидејќи практично Србија го призна Косово“.

„Србија е свесна дека патот до членството на ЕУ поминува низ признавањето на Косово и тотално помирување со соседите“, додал Тачи.

Хашим Тачи потврди дека по истекот на мандатот на актуелниот претседател на Косово Атифете Јахјага тој ќе се кандидира за претседател. Тоа е дел од договорот со премиерот Иса Мустафа и тоа е стабилизирачки фактор во републиката, појаснил косовскиот министер за надворешни работи.