Тајкуните во Белград ќе организираат „спонтани“ немири?

Добивај вести на Viber

Српската агенција за разузнавање БИА неодамна доставила известување до српските власти дека постои план во земјата да се предизвикаат големи немири на есен, објавува порталот Информер. Како што пренесуваат и останатите српски медиуми, во информацијата стои дека „тајкуни, странци и екстремисти планираат најдоцна на есен во земјата да предизвикаат спонтани немири, кои би довеле до судири и насилна промена на власта“. Информацијата ја открил претставник на БИА, кој сакал да остане анонимен и кој тврдел дека според информациите на српското разузнавање „на земјата ú се подготвува црно сценарио од повеќе страни“. „Не се работи тука за голема група која е во завера, туку за повеќе такви групи кои имаат заеднички интерес. Тие силно сакаат оваа власт, која ќе победи и на изборите на 16 март да биде урната што е можно побрзо. Тајкуните, од кои Мирослав Мишковиќ, сопственикот на Делта, е само еден, се подготвени да платат колку што треба. Некои странски служби, пак, би сакале земјата да ја видат на колена, а екстремистите едвај чекаат нов 5-ти октомври“, тврди овој извор. Проценка на овие екстремисти била дека наесен ќе созрее ситуацијата за широк социјален бунт.