Тензично и насилно во зградата на ССМ - В.Д. претседателот нападнат, стариот не се дава

Добивај вести на Viber

Во зградата на ССМ дојде до инцидент откако четирите гранкови сидникати кои дигнаа бунт и вчера направија обид да ја вратат контролата но, се соочија со приватно обезбедување ангажирано од Живко Митревски. 

Токму нивната намера да не ја напуштаат зградата довело и до физички судир, тие тврдат дека новоизбраниот претседател Дарко Димовски бил истепан и завршил на трауматологија, додека пак приватните обезбедувачи ја туркале и полицијата која била повикана да интервенира. 

Ова пак целосно го демантира сегашното раководство на ССМ кое не се откажува од власта и од неодамнешните избори на дел од синдикалците кои го посакуваат Димовски, а не Митревски за свој претседател.

„13-те грански синдикати и легитимно избраното раководство предводено од претседателот на ССМ, д-р Живко Митревски, јасно го добија легитимитетот и со најновото решение од Министерството за труд и социјална политика на Р. Македонија, со кое се поништи претходното донесено Решение од поранешната техничка министерка, донесено врз основа на фалсификувани документи, донесено врз основа на незаконити и нестатутарни дејствија спротивни на Закон и Статутот на ССМ“, се вели во соопштението од ССМ.

Исто така покренати се и повеќе кривични пријави против групата предводена од Дарко Димовски, Пецо Грујовски, Живко Даневски и Пеце Ристески, за фалсификување на исправи, злоупотреба на службена положба, злосторничко здружување, лажно претставување, за кои се отворени кривични постапки и истраги пред Основното јавно обвинителство, велат од ССМ и негираат дека некој бил претепан.

Инаку ваквиот епилог следува откако Министерството за труд и социјална политика синоќа соопшти дека го поништило решението со кое претседателот Живко Митревски е разрешен од функцијата, со што Митревски останува легитимен претседател на ССМ. Од четирите синдикати најавуваат дека ќе се огласат со соопштение.