ТЕШКА СООБРАЌАЈКА НА ПАТОТ КОН ГРАНИЧНИОТ ПРЕМИН БОГОРОДИЦА - едно лице загина, друго е повредено
Објавено во: Македонија 03 Јули, 2024
Едно лице го загуби животот, а друго е повредено во сообраќајна несреќа што се случила на автопатот од клучка Гевгелија кон Граничниот премин Богородица.
Како што соопштуваат од СВР Струмица, во сообраќајната несреќа, која се случила синоќа 30 минути по полноќ учествувале товарно возило „ман“ со велешки регистарски ознаки, управувано од Б.Ј.(35) од село Селемли, општина Богданци и товарно возило „ивеко“ со гевгелиски регистарски ознаки, управувано од С.А.(26) од село Стојаково, исто така од Општина Богданци.
- Во несреќата со тешки телесни повреди се здобил Б.Ј., кој на пат кон Клиничкиот центар „Мајка Тереза“ им подлегнал на повредите, а смрт констатирал лекар. Другиот возач, С.А., се здобил со телесни повреди, констатирани во Општата болница Гевгелија - се посочува во соопштението на СВР Струмица.
На местото на несреќата увид извршила екипа од ОВР Гевгелија.