ТИК-ТОК ДА СЕ ЗАБРАНИ ИТНО: И ние имаме жртви на социјалните мрежи кои поттикнуваат насилство, Зајкова предлага
Објавено во: Македонија 06 Мај, 2023
Претседателката
на ЛДП и пратеничка, Моника Зајкова денеска од партискиот конгрес порача дека
имаат низа предлози кои ќе ги достават до Владата со цел да се спречат немили
настани во кои жртви може да бидат посебно младите, а во контекст на крвавите
масакри што се случија во Србија.
-Наместо да седиме шокирани и тивко да тагуваме и коментираме на социјалните мрежи на време да реагираме и да дејствуваме со конкретни превентивни мерки и акции. Изразувам најдлабоко сочувство до семејствата и блиските на убиените лица и ги осудам крвавите масакри во Србија. Оваа спирала на насилство извршена од млади лица мора да го вклучи црвениот аларм и кај нас и потребно е преземање на итни и ефикасни превентивни мерки за да се спречи врсничкото насилство, грозоморните слики од убиени и повредени, истакна таа.
Според неа прво треба да се забрани ТикТок, но и други социјални мрежи и видоигри и филмови со насилни содржини.
-Особено е потребна забрана на „Тик-ток“ како и останатите социјални мрежи кои поттикнуваат насилство бидејќи и во нашата земја сведочевме на жртви од користењето на овие мрежи. Забрана и контрола на симнување на игри, содржини и апликации кои експлицитно покажуваат и поттикнуваат насилство. Исто така, преглед и контрола на филмови кои можат особено кај помладите луѓе да поттикнат насилство, манипулативно да бидат употребени во пропагандистички цели со величење на насилството, рече Зајкова.
Во низата иницијативи на ЛДП се и оние кои се однесуваат на најостра контрола на издавањето и поседувањето на огнено оружје, проверка кој се поседува оружје, контрола и забрана малолетни лица да вежбаат во стрелишта и казни за родителите кои ги мотивираат децата да ракуваат со вакви убиствени направи.
Министерство за правда да ја разгледа состојбата и предложи заострување на казнената политика со намалување на возраста за кривична одговорност согласно европското законодавство и практики, како и поголема контрола во училиштата и ангажирање на психолози и педагози за превенирање на булингот во образовниот процес.