„Тиквеш“ лансира вина со специјална етикета

Добивај вести на Viber

Винарската визба „Тиквеш“ лансираше вина со специјални етикети кои им овозможуваат на љубителите на виното сами да креираат лична посвета, впишувајќи го датумот, личноста и пригодата за која е наменето виното што го подаруваат. Засега, серијата вина со специјални етикети ја сочинуваат ограничени количини „Вранец Спешл Селекшн“ и „Темјаника Спешл Селекшн“, кои на почетокот ќе бидат достапни во поголемите трговски синџири и специјализирани продавници ширум земјата. „Виното е совршен подарок за секоја пригода. Тргнувајќи од тоа, дојдовме на идеја да им овозможиме на љубителите на виното да стават своја лична посвета на самата етикета со што виното добива уникатен белег за одбележување на датумите и пригодите кои се значајни во животот на секој од нас“, велат од „Тиквеш“. Одлуката за лансирање на вакви вина е дел од од програмата за одбележување на Св. Трифун, празникот посветен на заштитникот на лозарите. За празникот покрај традиционалното закројување на лозите, кое годинава ќе биде одбележано во месноста Лепово, најавуваат дека во 100-тина популарни кафулиња и ресторани ширум земјата ќе ги промовираат своите производи по симболична цена. Изминатата 2013-та година за најголемата винарија во Македонија била делумно успешна - компанијата остварила голем подем на светскиот пазар, но стагнација и пад на регионалните пазари. Како посебен успех од компанијата го потенцираат пробивот на британскиот и данскиот пазар, зацврстувањето на американскиот пазар и почетокот на извозот во Кина.