Тимоние: Потребна е одговорна влада и политичари со чувство за општ интерес

Добивај вести на Viber

Aмбасадорот на Франција во Македонија, Кристијан Тимоние се надева дека комесарот Јоханес Хан ќе најде решение за спориот процес во Македонија.

Според Тимоние, важно е да се донесе одлука за формирање Влада, затоа што постојат економски и политички предизвици поради кои земјата не може да чека. 

„Има економски и политички предизвици и секој очекува една силна Македонија, Македонија која ќе биде почитувана во својот територијален интегритет, суверенитет и своето единство. Македонија треба да остане на патот кон ЕУ и НАТО и за тоа е потребна одговорна влада што ќе биде способна да донесува одлуки и реформи и политичари со чувство за општ интерес на земјата“- изјави Тимоние.

Еврокомесарот Јоханес Хан и тројката европски пратеници утре доаѓаат во Македонија со цел да направат уште еден обид за излез од политичката криза.

Тој ќе се сретне со политичките челници, а нема да им излезе во пресрет на иницијативата „За заедничка Македонија“ иако тие бараа Хан да ги слушне и нивните барања. 

Хан и минатиот месец беше во Скопје. Тогаш тој порача дека очекува во Македонија брзо да се формира влада.