ТИРЗ се сели на друга адреса и набавува мебел за 500.000 евра
Објавено во: Македонија 20 Јуни, 2024
Дирекцијата за технолошко индустриско-развојни зони ќе ги напушти своите канцеларии во центарот на СКопје, кои и се доделени без надомест од Владата, и ќе се преселат во нови во подтрибинскиот простор на „Националната арена“ во Скопје.
Просториите се на акционерското друштво во државна сопственост за стопанисување и управување со станбен и длеовен простор, а месечната кирија ќе биде 20.000 евра.
Истовремено, пишува РСЕ, Дирекцијата за ТИРЗ ќе плати 500.000 евра за нов мебел во овие простории, но и во придружните канцеларии во другите градови.
Се купуваат работна столица за раководител, столици за посетители кај раководител, работни маси, бироа, конференциски маси, клуб маса, фиокари, плакари, комоди, табуретки, зеленило.
За опремување на четири објекти со кои располага ТИРЗ на различни локации, ќе бидат потрошени околу 29 милиони денари или нешто помалку од пола милион евра.
Административните згради на индустриските зони во Скопје, Штип, Прилеп и Тетово ќе се подноват со нов канцелариски мебел од фирмата СПС Инженеринг од Скопје.
Според директорот на ТИРЗ,Јован Деспотовски, потребата за опремување на канцелариите е поради тоа што во изминатите две години изградени се три нови функционални објекти во ТИРЗ Прилеп, Струга и Штип. До сега вработените и службите користеле времени објекти - контејнери кои како што вели се сосема вон стандардите за нормално работење.