Тодоров дисциплинира и лекари и пациенти – преглед се закажува по Интернет

Добивај вести на Viber

85 проценти од матичните лекари работат со електронското закажување прегледи во рамки на системот„Мој термин“, а во овој тест период расте бројот на специјалисти кои закажуваат на овој начин, истакна министерот за здравство Никола Тодоров кој додаде и дека досега биле направени над 50 илјади електронски упати.

Ова, рече Тодоров е најсложен елетронски систем креиран во здравството во Македонија, а го нема во ниту една земја во регионот.Тој додаде дека системот е веќе прифатен од лекарите и од пациентите кои постепено се навикнуваат на новиот начин на функционирање во здравството. Електронскиот систем „Мој термин“ се воведува етапно и досега се вклучени само специјалистички упати, рече Тодоров и додаде дека потоа ќе се надградува со останатите упати.

„Сите здравствени установи на секундарно и терцијарно ниво кои се вклучени во системот се информирани дека во преодниот период на прилагодување кон новиот начин на закажување и упатување треба да се организира работата во установата, да се овозможи целосно почитување на закажаните термини, но и да се овозможи секој кој ќе дојде без ваков упат да биде прегледан за да не се создава револт, дополнително чекање или отпор кон целиот систем.Поентата ни е во овој период да нема вратени пациенти, но и во периодот по отпочнување со примена на овој систем“, рече Тодоров.

Во меѓувреме, како што истакна, се изврши обука на над 2.000 доктори за користење на овој систем кој е многу едноставен за користење. Тодоров исто така посочи дека ќе се санкционира неодговорното однесување, а за секое најавено оправдано отсуството на лекарот, тој има обврска да го извести пациентот најмалку три часа пред неговиот термин.

„За пациентите кои се меѓу првите закажани ќе треба да се обезбеди замена, или ако пациентот дошол на закажаниот преглед, а ако не бил известен дека има промена на терминот, здравствената установа ќе биде должна да му го надомести трошокот за пат што го направил. Ако пациентот не дојде го губи закажаниот термин и може да се прегледа во почетниот период на имплементација како последен. Доколку го пропушти денот на прегледот комплетно е анулиран терминот и мора да оди повторно на матичен лекар за да му закаже нов термин“,истакна  Тодоров.

Новиот тест систем за електронско закажување беше воведен минатиот месец.