Традицијата за Бадник продолжува и годинава и покрај студеното време
Објавено во: Мои пари 04 Јануари, 2017
Во петок, 6-ти Јануари 2017 година на платото пред Соборниот Храм Свети Климент Охридски ќе се одвиваат завршните активности во рамките на годинашниве Бадникарски свечености.
Новиот Кум Радко Манов ќе го прими преодниот ќуп од рацете на Поглаварот на Македонската православна црква Г.Г. Стефан и заедно со минатогодишниот Кум Илија Малинковски ќе заминат со пајтон, препознатливото превозно средство за Скопје, поздравени од сограѓаните кои со симпатии и одобрување ќе ја проследат и оваа 25-та прослава на Бадник во Скопје.
Традиционално средбата ќе започне со химната исполнета од Силви Бенд и осветувањето на бадниковите гранчиња, нафората и топлата ракија и чајот, по што делегација на Одборот за прослава заедно со Кумот за Бадник 2017 ќе замине за Злокуќани во домот за стари лица за да им ја пренесе атмосферата на сограѓаните со осветеното Бадниково гранче и да им однесе пригодни подароци за Бадник.
Врвот на прославата се обраќањето на Поглаварот на МПЦ Г.Г. Стефан, здравицата на Љубиша Николиќ, кусото обраќање на скопскиот градоначалник Коце Трајановски и на годинешниот Кум Радко Манов, кршењето на погачата со паричка и примопредавањето на преодниот пехар.
Членовите на Здружението Одбор за традиционална прослава на Бадник во Скопје се подготвени, како и години наназад, во целост да придонесат за продолжување на традицијата на пладневно дружење пред Бадник во пресрет на најсветлиот христијански празник Божик и ги канат скопјани на платото пред Соборниот Храм за да ја почувствуваат позитивната енергија и покрај студеното време.