ТРАНСПОРТ, УГОСТИТЕЛСТВО, ГРАДЕЖНИШТВО: Ќе им треба време да се опорават по ударот на пандемијата

Добивај вести на Viber

Некои сектори полесно, а други потешко ќе се опорават од корона кризата.

Тешко е да се процени кога бизнисот целосно ќе се врати во нормала по пандемијата на Ковид 19. Овој неактивен период и немањето работа негативно ќе се одразат на периодот кој следи.

Најголем удар ќе претрпат кафетериите, рестораните, хотелите,  транспортот и дистрибуцијата, како и градежништвото заедно со сродните категории. Тие ќе имаат потешкотии да се опорават како резултат на намалувањето на обемот на работата, или целосната апстиненција во овој период. 

„Не можe точно да се каже колку време ќе треба додека да се надмине кризата креирана од пандемијата, бидејќи нејзините димензии се глобални и добро е познато дека ние како економија сме силно под влијание на меѓународниот пазар. Треба да се напомене дека овие категории се најголеми придонесувачи во БДП-то и во тоа ние како Комора во неколку наврати изразивме загриженост за истото бидејќи хотелите  и туризмот се потполно затворени за значителен период. Нашата проценка за оваа состојба е дека сите сектори ќе ги почувствуваат последиците од пандемија некој повеќе, а некој помалку, и дека на сите ќе им биде тешко да продолжат, но горенаведените категории и оние со слични ситуации ќе имаат најсериозни проблеми, а економијата веројатно ќе биде дополнително оштетена доколку истите категории не се вратат во нормала што е можно поскоро“, велат од Стопанската комора на северо - западна Македонија.

Во Македонија угостителите  беа меѓу првите  кои се пожалија дека ќе отпуштат илјадници луѓе поради корона кризата. Поплаки имаше и од туристичкиот сектор кои исто така минува низ многу неисвесен период.

Македонската економија годинава треба да падне за 3,4 отсто според основното сценарио на МФ, со тоа што негативните ефектите се очекува да бидат најголеми во второто тримесечје, во третото се очекува забаваување на контракцијата, а во четвртото закрепнување и позитивен резултат.

Само во март, бројот на невработените во земјава се зголемил за околу две илјади лица, или попрецизно, 1.916 нови невработени. Ова го покажуваат официјалните бројки на Агенцијата за вработување. Во март, имаше вкупно 107.732 невработени во земјава.

Сепак, над 70 отсто од домашните компании, членки на Стопанската комора на Македонија не планираат да затвораат, а 21 отсто од нив планираат затворање ама само на делови од компаниите, и покрај проблемите. Ова го покажуваат податоците на комората базирани на тврдењата на самите компании и нив ги соопшти Антони Пешев, претседавач на Собранието на Стопанската комора на Македонија. 

Сања Атанасовска