Треба да знаете грчки јазик за да се вработите во овој македонски град
Објавено во: Македонија 10 Јануари, 2019
Потребно е да се знае грчки јазик во Гевгелија за вработување, затоа што во овој град доаѓаат купувачи од соседна Грција.
Се бара познавање на грчки јазик за работа во казината, угостителските објекти, продавниците, па и ординациите. Од училиштата за странски јазици велат дека порано имало поголем интерес за курсеви по грчки јазик, а денес повеќето жители на Гевгелија знаат да зборуваат, и со тоа интересот е помал за изучување на овој јазик.
„Пожелно е да се знае јазикот за вработување, впрочем добро е да се знае било кој јазик. Во угостителските објекти бараат да се знаат основни работи на грчки. Пред пет години имаше многу поголем интерес за изучување, а сега повеќето веќе го знаат и го зборуваат јазикот“, велат од училиште за странски јазици во градот.
Од друго училиште додаваат дека имаат групи од по десетина ученици, и повеќето од нив се возрасни луѓе, на кои јазикот им е потребен за вработување.
„Младите сега повеќе се фокусирани на германски јазик, го учат за да заминат за Германија. Оние кои учат грчки јазик, обично посетуваат курсеви и земаат втор степен, затоа што толку е доволно за да се има основна комуникација. Но, има и Грци кои го учат македонскиот јазик, затоа што тука живеат, имаат бизниси, а има и пензионери кои се жители на градот“, објаснува професор по странски јазици.
Друг сопственик на училиште за странски јазици, вели дека околу 2000 година и подоцна имало еуфорија и голема желба да се учи грчки јазик, од практични причини, а во денешно време според него, јазикот се учи и преку комуникација со Грците кои го посетуваат градот.
„Прво да научат да се разберат, а потоа учат и многу други работи и така се совладува јазикот. Потоа човек се усовршува во таа сфера во која работи, совладува вокабулар. Сега мислам дека има помалку учење на јазикот низ училишта, и повеќе е учење во пракса“, додава тој.
Но, има и жители на Гевгелија кои изминативе години како невработени лица преку АВРМ успеале да поминат обука за грчки како странски јазик.
Гевгелија се наоѓа на 9.1 км од македонско - грчката граница. Поради близината и цените, Грците доаѓаат во Гевгелија за да пазарат, поправаат заби, да одат на фризер и слично.
Сања Атанасовска