Тридневна акција за чистење на Аеродром

Добивај вести на Viber

Почнувајќи од денеска, во следниве три дена ќе се чисти територијата на Општина Аеродром со помош на механизација на јавните претпријатија на Град Скопје. Според планот, јавните комунални претпријатија ќе интервенираат во области кои што се во нивна надлежност, како кастрење на гранките на дрвјата, санирање на ударните дупки на улиците, акции за чистење на зелените површини и улиците, интервенции за подобрување на водоснабдувањето. Истовремено во општината на повеќе локации ќе бидат поставени специјалните контејнери за кабаст отпад. Како што најави скопскиот градоначалник, Коце Трајановски, паралелно со овие активности на градските јавни претпријатија ќе се одвиваат и средбите со претставниците на урбаните и месните заедници од Општина Аеродром. „На овие средби тие, како главен коректор и оценувач на работата на Градот Скопје и јавните претпријатија ќе можат да ни ги пренесат проблемите со кои се соочуваат жителите на Општина Аеродром, да предложат начини за надминување на овие проблеми, како и да дадат предлози на нови проекти со кои би се подобрил животот на жителите на Аеродром“, истакна Трајановски.