Ципрас: Топката сега е во дворот на ЕУ
Објавено во: Економија 23 Јуни, 2015
Грчкиот премиер Алексис Ципрас оцени доцна синоќа, после состанокот на еврозоната во Брисел, дека сега „топката е во дворот на Европските власти“ за пронаоѓање на договор како Грција би избегнала банкрот.
-Имам чуство дека сега топката е во дворот на европските власти - рекол Ципрас за новинарите на крајот на состанокот на кој се расправаше за новите предлози на власта во Атина пред кредиторските институции - ЕУ, ММФ и ЕЦБ.
Ципрас рекол дека грчкиот основен критериум е „социјална правда“.
„Ќе ги штитиме платите и пензиите и просечните семејства“, истакнал грчкиот премиер.
-Нашиот предлог е прифатен како основа за преговори кои ќе бидат продолжени наредните денови - додал Ципрас, наведувајќи дека Грција „не сака временски ограничен договор, туку целосно и одржливо решение со економски раст и способност на земјата да остане на свои нозе“.
Лидерите на државите од ЕУ членки на еврозоната синоќа во Брисел заклучиле дека новите предлози на владата во Атина се „Позитивен чекор напред“ кон решавање на грчката криза и денес министрите за финансии на еврозоната ќе ја утврдат конечната оцена која треба да ја потврдат шефовите на државите на ЕУ во четврток.
Тоа по завршувањето на состанокот со лидерите на еврозоната го соопштил претседателот на Европскиот совет Доналд Туск кој рекол дека е „уверен дека со предлозите кој грчката влада ги изнела, може да се дојде до решение за спречување на хаотично и неконтролирано излегување на Грција од еврозоната“.