Турција планира да извезе оружје вредно две милијарди долари годинава

Добивај вести на Viber

Турската воена индустрија лани забележала раст на извозот за 10% во однос на претходната година и достигна вредност од 1,4 милијарди долари, соопшти Асоцијацијата на турски извозници од одбранбената и вселенската индустрија. Во периодот меѓу 2008 и 2012 година извозот на турската воена индустрија пораснал за 43 отсто, а една третина од вкупното производство било наменето за странство. Претседателот на Асоцијацијата Љатиф Арал Алиш напомена дека во 2014 година секторот очекува да оствари извоз во вредност од две милијарди долари. „САД, кои се водечки светски производител во областа на одбранбената индустрија, се наоѓаат на врвот на земјите кои купуваат турски одбранбени програми“, забележа Алиш. Зголемениот извоз во 2013 година во најголем дел се должи на турскиот производител ТАИ (Турска вселенска индустрија), чиј извоз е во вредност од 537 милиони долари. ТАИ го произведува турскиот борбен хеликоптер АТАК, наставно-тренажниот авион Хуркуш и првиот беспилотен авион од турско производство Анка.