Твитерџиите бесни поради загадениот воздух - партиите продолжија со обвинувања
Објавено во: Македонија 04 Декември, 2018
Прстот го вперуваат во власта, за која сметаат дека не е доволно посветена на решавање на проблемот. Скопје во моментов е 8-ми најзагаден град во светот, покажува air visual.
Партиите си ја префрлаат одговорноста за аерозагадувањето.
Граѓаните на Република Македонија додека се гушат во загаден воздух, Владата на СДСМ спие.Кога треба да се преземат краткорочни и долгорочни мерки за спречување на загадениот воздух, Владата на СДСМ си игра игрици, соопшти ВМРО-ДПМНЕ.
Од СДСМ велат дека проблемот со загадувањето на воздухот 11 години беше целосно игнориран од власта на ВМРО-ДПМНЕ која не презеде ништо, затоа што мислела како на криминален начин да приграби што повеќе пари од граѓаните.
Заменик министерот за животна средина и просторно планирање Јани Макрадули го престави Планот за чист воздух на Република Македонија на министерската конференција „Иновативни решенија за намалување на загадувањето во Југоисточна и Јужна Европа” што денеска и утре се одржува во Белград.
Главна цел на конференцијата е изнаоѓање на заеднички начини и мерки за унапредување на животната средина, здравјето на луѓето и развојот на економијата во овој дел на Европа.