UBS: Негативните каматни стапки се голем предизвик за банките

Добивај вести на Viber

Негативните каматни стапки претставуваат голем предизвик за швајцарските банки, а посебно за нивните настојувања да го одбранат својот нето профит, изјавил директорот на швајцарската банка UBS, Аксел Вебер. Тој на една дебата во Берн рекол дека јануарското воведување на негативни каматни стапки во Швајцарија ги принудило банките да го променат начинот на управување со недвижнини, како и долгорочни инвестиции. „Негативните каматни стапки се посебен предизвик за нето профитот на банките“, изјавил Вебер на собирот, организиран под закрила на Швајцарската банкарска асоцијација. Во јануари оваа година централната банка на Швајцарија  (SNB) воведе каматна стапка од минус 0,75 одсто на актива во посед на финансиските институции, вклучувајќи банки, трговци со хартии од вредност и осигурителни компании. SNB воведувањето на негативни каматни стапки го најави уште во декември минатата година со цел спречување на понатамошно јакнење на франакот. „Јануарската одлука имала силен одек во Швајцарија“, изјавил директорот на швајцарската филијала на американската компанија за управување со активи Блек Рок, Кристијан Хинц, и додал дека инвеститорите го пренасочиле интересот на алтернативни инвестиции , меѓу кои се и оние со поголем ризик, но и оние пасивните како што се финансиските индекси. Како што оценуваат некои експерти, негативните каматни стапки задаваат уште еден удар на швајцарските банки, кои веќе се под притисок да ја зголемат транспарентноста, во светло на скандалот како што е „Svisliks“ поради кој банката HSBC минатата недела морала да плати 40 милиони франаци компензација како би ставила точка на обвиненијата дека нејзината швајцарска филијала им помагала на клиентите да затајат повеќе милиони долари данок.