Универзална сала се реконструираше за 2 милиони евра, следуваше уште еден тендер

Добивај вести на Viber

Од денеска на местото на култната „Универзална сала“ постои само металната конструкција, откако репрезентативниот објект го зафати огромен пожар претпладнево, засега од непознати причини.

„Универзална сала“ изгоре додека во тек се одвиваа градежните активности за реконструкција на надворешниот дел, по што требаше да следува договор со оператор за ново внатрешно уредување.

Градежното проектантско трговско друштво Универзал-Балкан во 2021 е избрано за носител на групата проектанти која за 2 милиони евра врши реконструкција на фасадата и кровот на Универзална сала.

Вкупната вредност на договорот изнесува 115 милиони денари.  Договорот вклучува рушење и демонтажа на фасадата, но и на куполата, подовите и другите елементи, ископ, бетонирање, армирање, монтажа на челична конструкција, нанесување на фасадата. Универзална сала требаше да добие нови врати, нов челичен лим на покривот и нова изолација.

Со усвојување на ребалансот на Буџетот за 2020 година, Владата за овој култен објект во Скопје одвои средства во износ од 120 милиони денари. Во меѓувреме следуваше ковид-периодот, а потоа новата градоначалничка Данелка Арсовска не покажа интерес да продолжи со реконструкцијата, со изговор дека има недостатоци во проектирањето. Од оваа година ингеренциите од Град Скопје ги презеде Министерството за култура.