УПИСИ ВО СРЕДНИТЕ УЧИЛИШТА ОД УТРЕ: Каде има најголем интерес, ќе има ли приемни испити ако има преголема навала во гимназиите?

Добивај вести на Viber

Од утре, 14. Јуни почнуваат уписите во средните училишта, а во јунскиот уписен рок има има три пријавувања и запишувања – првото е на 14 јуни од 12 до 19 часот, на 15 и 16 јуни училиштата ќе примаат пријави од 7 до 19 часот и на 17 јуни – од 7 до 15 часот. Ранг-листите со резултатите од запишувањето и слободните места ќе бидат објавени на 17 јуни по 16 часот.

Квалификациското тестирање ќе се организира во училиштата на 21 јуни 2021 година и тој ден ќе бидат објавени конечните ранг-листи со резултатите. Второто пријавување овој месец е на 23 и 24 јуни, а третото е на 30 јуни. Според Конкурсот на Министерството за образование и наука, во јавните средни училишта слободни се 30 053 места во 913 паралелки во 109 средни училишта.

Од вкупниот број слободни места во прва година средно, 19 602 се во стручно образование во 604 паралалеки, 9261 во гимназиско образование во 274 паралелки и 1190 места во 35 паралелки се за училиштата од уметничко образование, спортска академија, спортска гимназија и за математичко-информатичка гимназија.

Конкретно во Скопје, најголем интерес има за запишување во гимназиите и средното медицинско училиште. Учениците, но и нивните родители веќе знаат доколку имаат барем една четворка, нема да може да се запишат во некои од познатите гимназии.

Во разговор за Фактор велат дека „Орце Николов“, „Раде Јовчевски-Корчагин“, „Ѓорѓи Димитров“, „Никола Карев“ се дефинитивно гимназии каде ќе има најголем број пријавувања, а истовремено стравуваат дека можно е да има и приемни испити ако бројот на ученици со успех 5.0 е поголем од предвидента квота.

-Ова се зборува со години наназад, но за среќа досега немаше приемни испити. Не знаеме што ќе се случува оваа година, но секако интересот за овие неколку гимназии е преголем, велат дел од родителите на децата кои утре ќе поднесуваат документи.

Надлежните знаат дека и оваа година најголемата навала ќе биде токму во гимназиите, заради што МОН спроведе и кампања „Учи паметно, работи стручно”и фокусот го стави средното стручно образование. За да се мотовираат учениците да се запишат во средно стручно образование, воведени се и стипендии во текот на деветте месеци од идната учебна година: две илјади стипендии во вредност од 3.500 денари за сите ученици кои ќе се запишат во дуална паралелка или во тригодишно стручно образование и 200 стипендии од 2.200 денари ќе им бидат доделени на ученици запишани во прва година во дефицитарните струки, како електротехничката, машинската, угостителско-туристичката, градежно-геодетската, земјоделско-ветеринарната и текстилно-кожарската струка.