Уредник уценувал претставник на ДИК, од весникот негираат

Добивај вести на Viber

Новинар и главен и одговорен уредник на дневен весник уценувал претставник на Државната изборна комисија, стои  во полицискиот билтен. 

Преставникот на ДИК вчера во СВР Битола пријавил дека главниот и одговорен уредник на весникот „Лајм“ му се заканувал со компромитирање на неговата личност ако во весникот не бидат објавени кандидатските листи за пратеници.

Реџеп Прекопуца кој е и член на ДУИ, вчера бил на службено патување со уште двајца претставници од ДИК во Битола заради надзор за печатење избирачки материјал. Од МВР известуваат дека тој пријавил дека на неговиот службен мобилен телефон му се јавило лице кое му се претставило дека е од дневен весник „Лајм“.

Прекопуца се пожалил дека му биле упатени разни погрдни зборови како и закана од уредникот на „Лајм“ дека ќе биде даден на суд доколку весникот не добие 20 илјади евра.

Од весникот „Лајм“ тврдат дека се работи за груби лаги изнесени од потпретседателот на ДИК, Реџеп Прекопуца кон уредникот на весникот „Лајм“. Велат дека Прекопуца бил тој кој се заканувал, пцуел и викал по уредникот на „Лајм“. 

„Лајм“ информира дека вчера го побарале Прекопуца откако од ДИК ги известиле дека токму поради негова грешка нема да се објави оглас во нивниот весник за кој претходно се договориле. 

„Нашата понуда за објавување оглас од 30 страни во вредност од 240 илјади денари (цена со 50% попуст во однос на официјалниот ценовник) пред членовите на ДИК, Прекопуца ја претставил како понуда од 1 милион и 240 илјади денари“ - пишува во известувањето од весникот.

Според „Лајм“ ова е намерно направено затоа што, како што објаснуваат, во документот подолу пишувало дека цената за објавата со ДДВ ќе биде 280.000 денари. Тие најавија и тужба.

Од МВР  работат на целосно расчистување на случајот.