Уште една „собраниска“ средба за СЈО
Објавено во: Македонија 23 Септември, 2019
Работните групи на власта и опозицијата денеска во Собранието ќе одржат нова средба за законот за јавното обвинителство, односно за судбината на СЈО. Состанокот ќе биде прв по лидерската средба на претседателите на двете најголеми политички партии, Зоран Заев и Христијан Мицкоски, на која не беше изнајден заеднички јазик за овој закон.
По седумчасовните преговори Заев го обвини Мицкоски дека „промовирал „Груевизам“ до крај“. Мицкоски по лидерската средба рече дека планот на Заев бил да не биде постигнат договор и дека премиерот сакал да го контролира обвинителството за да не одговара за „Рекет“. Од друга страна, премиерот Заев по лидерската средба изјави ВМРО-ДПМНЕ побарале предметите на СЈО пред 30 јуни 2017 година да ги преземе Обвинителството чиј што шеф ќе дојде на предлог од опозициската партија. Додаде дека СДСМ се согласува специјалниот обвинител да биде одбран од опозицијата, но да биде познавач со кредибилитет.
Преговорите во моментов се стопирани за моделот на функционирање на Обвинителството за организиран криминал и корупција и вклученоста на СЈО во овој орган. Владата има тенденција да го подели во Обвинителството за гонење на организиран криминал и Обвинителството за гонење на висока корупција, додека опозицијата го брани сегашниот модел. Исто така, постојат разлики во врска со употребата на бомбите и периодите до кога можат да важат како докази.