Вајгл за Фактор: Повикот на Иванов за бојкот е неприфатлив

Добивај вести на Viber

Одлуката на претседателот Ѓорге Иванов да го бојкотира претстојниот референдум е неприфатлива, а Европската Унија ја осудува неговата изјава, вели известувачот за Македонија во Европскиот Парламент Иво Вајгл. Во ексклузивен разговор за Фактор, словенечкиот европратеник вели дека граѓаните од Македонија се наоѓаат пред историска одлука чиј исход треба да го трасира патот на земјата за влез во НАТО и за започнување на преговарачкиот процес во Унијата.

„Јас мислам  дека македонскиот народ одлучува за својата иднина. Тоа гласање не е само за одлука за прашањето што се однесува со Грција, туку ова прашање ја дефинира евроатланската иднина на земјата. Ова е историски момент  и уникатна можност Македонија да се приближи кон најнапредниот дел на Европа, а тоа е ЕУ. Од друга страна така земјата ќе ја загарантира и својата сигурност и безбедност во НАТО алијансата. Овие две интеграции се многу потребни  за граѓаните и затоа е потребно тие да го поддржат гласањето и да излезат на референдум.

Има повици и за бојкот на референдумот. Најголемата опозициска партија, пак, ги повика граѓаните сами да ја донесат одлуката. Како ги оценувате овие ставови?

„ВМРО- ДПМНЕ  дава контроверзни изјави кои не водат кон ништо. Изјавата на претседателот Ѓорге Иванов за бојкот е потполно неприфатлива, Европската Унија ги осудува. Иванов  и во минатото правеше чекори кои Брисел ги осуди. Не е наше да го оценуваме, но неговиот став не и помага на Македонија. ВМРО-ДПМНЕ треба да остане конзистентна на своите рани делувања  кога се трудеше да ја внесе Македонија во НАТО и да отпочне преговои со Европската Унија. Опозицијата треба да продолжи со тоа делување и достигнување, а не да го врти грбот. Дури, важно е да се каже дека европските народни партии во најголем дел го поддржуваат реферндумот. Ако ВМРО ДПМНЕ и натаму продолжи со двосмислени изјави може да ги изгуби пријателите во Европската народна партија.

Но што ако референдумот биде неуспешен?

„Тоа ќе биде лош чекор за земјата и лоша порака која ќе стаса до Брисел. Втора шанса нема да има во догледно време. Не беше лесно да се добие поддршка за проширување, уште потешко да се натераат Грција и Бугарија да ја поддржат Македонија за влез во НАТО и во ЕУ.

Не знам дали и во догледна иднина ќе ги имате ваква можност, дали вашите внуци ќе добијат нова шанса. Можам да кажам дека ако одлучите за бојкот тоа ќе значи гасење на политичката иднина на Македонија.

Најавивте продолжение на дијалогот од процесот „Жан Моне“. Кога доаѓате во Скопје на средба со македонските пратеници?

„Да видиме како ќе помине ова. Се чека прво ратификација на преспанскиот договор во македонскиот Парламент. Потоа со пратениците ќе ја договориме агендата за точките и за разговорите. До крајот на годинава треба да продолжи дијалогот кој е дел од процесот „Жан Моне“. Суштински е да се работи на дијалогот меѓу власта и опозицијата.