Варуфакис: Тврдоглавоста на Еврогрупата и наштети на нејзиниот авторитет

Добивај вести на Viber

Одбивањето на Еврогрупата да го продолжи по 30 јуни времетраењето на планот за финансиска помош на Грција крие опасност да нанесе траен удар по еврозоната, изјави синоќа на крајот на седницата на Еврогрупата грчкиот министер за финансии Јанис Варуфакис.

"Одбивањето на продолжување на програмата за помош сигурно ќе наштети на авторитетот на Еврогрупата како демократска заедница и се плашам дека оваа штета може да се покаже како трајна", рече грчкиот министер за финансии, чија земја порано ги отфрли предлозите на доверители, за да избегне прогласување на неликвидност.

Грција "продолжува да се бори за постигнување договор во последната минута до вторник" кога земјата се соочува со опасноста од банкрот, ако не се договори со доверителите, додаде Варуфакис на специјална прес-конференција, откако ја напушти седницата на министрите за финансии, која  продолжи без грчки претставници.

"Ако таков договор се постигне, тогаш ние ќе кажеме на грчкиот народ да гласа со" да "на референдумот, кој Атина одлучи да организира на 5 јули", додаде Варуфакис.

Последната реченица сепак противречи на акутниот тон со кој доцна во ноќта грчкиот премиер Алексис Ципрас го објави организирањето на референдумот. Во своето обраќање до избирачите тој го нарекува планот на доверителите "неподносливо бреме" за нацијата и ги повика Грците да дадат "категоричен одговор" на "овој ултиматум".

"Грција, е уценета да прифатиме кастрење на трошоците и една понижувачка програма за кратенки која нема крај и нема поглед да ни застане на нозе, ве повикувам да одлучите патриотски и гордо, како заповед на горда историја на Грците", рече Ципраа.

Без договор и одобрување од страна на парламентите во Грција и другите земји од еврозоната до 30 јуни блокираните итни кредити ќе пропаднат. Станува збор за околу 7,2 милијарди евра, обезбедени од Европејците и Меѓународниот монетарен фонд (ММФ). Освен тоа нема да може да се користат и околу 11 милијарди евра, кои беа наменети за стабилизација на грчките банки. И покрај своите финансиски тешкотии сепак на 30 јуни Грција ќе мора да го отплати кредитот во износ од 1,540 милијарди евра конММФ.

Потсетуваме дека во ноќта на петок спроти сабота грчкиот премиер Алексис Ципрас објави свикување на референдум за следната недела.

"Прашањето на референдумот ќе биде дали ние ќе ги прифатиме предлозите (на доверителите) или да ги отфрлиме", објави Ципрас во обраќањето пренесувано на сите телевизиски канали .