(ВИДЕО) АРХИТЕКТУРА НА ИДНИНАТА: „Паметни градови“ во кои се вложуваат милијарди

Добивај вести на Viber

Милијарди долари се вложуваат во изградба на т.н. „паметни градови“, а само Индија има намера да изгради дури 100! Мегаломанскиот индиски урбан проект веќе се реализира. Премиерот Наренда Моди вели дека низ цела Индија наскоро ќе бидат изградени 100 „паметни градови“, опремени со високотехнолошки системи за комуникација. „Градовите некогаш се граделе во близина на реки. Сега се градат во близина на автопати. Но, во иднина, градовите ќе се градат врз основа на достапност на оптичка мрежа и инфраструктура од новата генерација“, вели тој. Владата на Моди во државниот буџет обезбеди 1,2 милијарди американски долари кои ќе ги вложи во паметни градови само во следната година, а уште повеќе инвестициски средства се очекуваат од приватните стопанственици и странските инвеститори. Оваа најава не е само празни зборови, бидејќи веќе започна изградбата на неколку високотехнолошки градови во Индија, вклучувајќи и еден на подрачјето на индиската држава Гуџарат, кој ќе се фокусира на потребите на урбаната средна класа. Во овие градови сензори ќе го надгледуваат нивото на водата, користењето на енергијата, протокот на сообраќајот и сигурносните камери, а сите тие податоци директно ќе им ги испраќаат на градските служби. Мобилни апликации ќе им помагаат на жителите полесно да учествуваат во сообраќајот, ќе им пријавуваат дефекти и ќе ги потсетуваат да гласаат на избори. Собирањето на ѓубре исто така ќе им биде доверено на машини. Овие градови се градат од нула што овозможува непречено планирање и реализирање на замисленото. Градовите веќе се градат, особено на подрачјето меѓу Делхи и Мумбај. Вака ќе изгледа еден од нив: http://www.youtube.com/watch?v=jOFpWFLSqgU http://www.youtube.com/watch?v=NkqTyV78bjA Но, Индија не е единствената држава која се фокусира на „паметни градови“. Градови со ваков концепт веќе се градат и во Јужна Кореја, Обединетите Арапски Емирати и Кина. Само Кина годинава во еден паметен град вложува осум милијарди американски долари.