(ВИДЕО) Заев: Идната влада не зависи од ДИК или Управниот суд-бидете спокојни!

Добивај вести на Viber

„Ги молам граѓаните да ги смират мислите. Јас и Груевски не се гледаме преку нишан на пушка, ние седиме заедно и разговараме заедно и одлучуваме за иднината на Македонија.

Можеби сме со спротивставени мислења, ние се слушавме и во текот на кампањата, и на молкот разговаравме за да го контролираме заедно изборниот процес . Немојте никој да ве лаже, доста ни се делби и поделби во наша Македонија.

Одлуките на ДИК и евентуално на Управниот суд се формално-правни процеси кои согласно Закон и Устав треба транспарентно да отпочнат и завршат“, рече Заев денеска од Битола.

Тој рече дека без разлика на резултатот , дали ќе биде во полза  на СДСМ или ВМРО-ДПМНЕ, ќе се создаде европска влада.

„Никола Груевски не може да создаде влада, тоа го знаеме и двајцата.

Европската Конвенција за човекови права овозможува да ја користат и уживаат сите граѓани на Европа и тоа е иднината на Република Македонија. Оваа Европска Конвенција за човекови права ќе биде основата на идното дејствување на новата Влада на Република Македонија. Европската Конвенција за човекови права ќе биде платформата врз основа на која ќе се создаде новото парламентарно мнозинство и основата на дејствување на идната Влада на Република Македонија. Граѓаните треба да знаат дека оваа европска конвенција ќе биде водилка за современата македонска држава, ќе се водиме од овие права што ги почитува цел демократски свет. Апелирам за спокој, единство и сплотеност. Државните институции имаат обврска да донесат транспарентна одлука“, изјави Заев од Битола.