Заев со Дачиќ и Тачи кај Могерини во Њујорк
Објавено во: Македонија 23 Септември, 2019
Премиерот Зоран Заев веднаш по пристигнувањето во Њујорк на Генералното собрание на ОН присуствуваше на вечерата што за шефовите на држави и влади на земјите од Западен Балкан, меѓу кои и Ивица Дачиќ и Хашим Тачи, ја приреди Високата претставничка за надворешна работи на Европската Комисија, Федерика Могерини.
Заев пред Могерини истакна дека сите напори на Македонија се фокусирани на тоа да се задржи позитивниот дух кај сите земји членки на ЕУ за поддршката за отворање на преговорите со ЕУ во октомври. Шефот на македонската Влада нагласил дека Македонија е подготвена да ги започне преговорите со ЕУ без натамошно одлагање.
- Стартот на преговорите ќе биде успех и на Северна Македонија и на ЕУ, како резултат на заедничките остварувања за време на предпристапниот процес, рече Заев.
Посетата на македонската владина делегација во Њујорк почнува денеска, а ќе трае до сабота за кога е планирано и обраќањето на Заев и тоа во претпладневната сесија. Инаку во САД заминува и грчкиот премиер Кирјакос Мицотакис, за кого грчките медиуми јавуваат дека ќе има средба со американскиот претседател Доналд Трамп, но и со Заев утре, иако се уште нема потврда.
Во агендата на премиерот е предвидена и официјална средба со генералниот секретар на ОН Антонио Гутереш, како и присуство на приемот на покана од претседателот на САД Доналд Трамп и сопругата Меланија по повод одржувањето на 74-тото Генералното собрание на ОН. Во состав на владината делегација, се и вицепремиерот за европски прашања Бујар Османи, министерот за надворешни работи Никола Димитров, министерот за здравство Венко Филипче и министерот за животна средина и просторно планирање Насер Нуредини. Заев в сабота треба да се обрати пред Генералното собрание.