(ВИДЕО+ФОТО) Дали новиот аеродром ќе ја внесе Турција во десетте светски сили?

Добивај вести на Viber

За прв пат Турците утре ќе летаат од аеродромот во Истанбул кој вчера беше пуштен во употреба и е најголем во светот. 

Турскиот претседател Реџеп Таип Ердоган вчера свечено го отвори новиот аеродром.

„Се надевам дека аеродромот ќе му користи на нашиот регион и на целиот свет“, рече Ердоган.

Тој ќе биде отворен за сообраќај кон крајот на декември, а првиот лет е планиран за утре кон Анкара.  Авионите од новиот аеродром дотогаш  ќе полетуваат само пет дестинации, сѐ додека новиот не го замени сегашниот презаситен аеродром „Ататурк“.

Се планира до 2028 година  тој да има капацитет од 200 милиони патници годишно, што е двојно повеќе од аеродромот во Атланта кој денес е на првото место.

Истанбул со новиот ќе има вкупно три аеродроми.

Новиот аеродром во прво време ќе има капацитет од 90 милиони патници годишно, со што ќе се вброи во петте најважни светски аеродроми во контекст на прифаќање патници. 

Но, изградбата на аеродромот ја следат и контроверзии. Станува збор за влијанието на проектот врз животната околина и пред сѐ за работните услови на над 34.000 работници кои се тркаа со времето за проектот да го завршат во предвидениот рок.

Штрајкот на работниците во септември беше брутално задушен со одведување стотина луѓе во затвор. Повеќето потоа беа пуштени, но дваесетина лица се сѐ уште затворени.

Загинаа триесетина работници за време на изградбата почната во 2015, но синдикатите тврдат дека вистинската бројка е двојно поголема.

Новиот истанбулски аеродром е најновиот во низата инфраструктурни мегапроекти за кои Ердоган се залага трудејќи се Турција да ја внесе во клубот на десет светски сили до 2023 година, кога земјата ќе прослави 100 години од прогласувањето на републиката.