„Види музика, слушни слика, добиј книга“ вечер во Градски парк

Добивај вести на Viber

Во Градски парк вечерва со почеток во 21 часот ќе се одржи шестата по ред мултимедијална манифестација „Види музика, слушни слика, добиј книга“ на која најголемите диско хитови од 1970-тите и 1980-тите години ќе бидат изведени од Македонска филхармонија. Спектакуларното музичко доживување насловено како „Disco fever“ ќе биде надополнето со перформансот на академските сликари Емил и Тони Шулајковски, кои паралелно со звуците ќе го создаваат своето дело на огромни платна со димензии 10 на 3 метри, со големи четки и со десетици литри маслени и акварелни бои. Исто така настанот ќе биде збогатен со поезијата на македонскиот и светски афирмиран поет, Никола Маџиров, a посетителите ќе имаат можност бесплатно да добијат примерок од книгата „Еден ден ќе се сретнеме“.За оваа цел обезбедени се 20.000 примероци кои ќе бидат раздавани на почетокот од концертот. Во книгата се сместени необјавени песни на поетот, како и стихови од поетските збирки „Заклучени во градот“, „Некаде никаде“, „Асфалт, но небо“ и „Преместен камен“. Организатори на манифестацијата се Македонска филхармонија и Младинскиот културен центар.