Вината на Стоби на саемот BeoWine во Белград

Добивај вести на Viber

Винарија Стоби и оваа година зема учество во интернационалниот вински саем во Белград, BeoWine што се одржува од 21 до 24 февруари. Според соопштението од винаријата, во текот на четирите саемски дена, ќе биде претставен целиот асортиман на бели, црвени и розе вина.

„Учеството на саемот BeoWine е на наша инцијатива и на наше заложување. Иако Стоби вината се веќе присутни и позиционирани на српскиот пазар сепак, мислиме дека саемското претставување си носи свои предности во однос на експанзија и промоција токму онаму каде што е најпотребна, меѓу експертите, дистрибутерите, деловните посетители, сомелијерите и вистинските, посветени познавачи на виното“, изјави Лидија Трајковска, комерцијален директор на Перминдекс.

Дополнителен мотив за учество на овој саем, според неа, е промовирање на винскиот туризам. „Досега многу вложивме во развивање на оваа посебно нова и атрактивна гранка, покрај самата коцепција на винаријата Стоби, како најмодерна винарница на Балканот, понатаму продолживме со отворањето на барик-одделот, на салите за дегустација и на ресторанот, сето тоа е во прилог на развивање на новото поглавје во винскиот туризам, а полагаме и многу во развојот на винската култура“, изјави Трајковска.

На површина од 1.640 м2 се изложени проближно 150 излагачи, од кои 37 странски односно од 13 европски земји. Бројот на посетители се движи околу 60.000, а околу 15 илјади од нив се деловни посетители.

Белградскиот вински саем се одржува во склоп на интернационалниот саем за туризам и е најголемата туристичка манифестација во земјите на југоисточна Европа.