„Винеа“ пак доцни со исплата: И лозарите и министерот незадоволни

Добивај вести на Viber

Иако винарската визба „Винеа” почна да го исплаќа долгот кон лозарите,  министерот за земјоделство, шумарство и водостопанство Љупчо Димовски вели дека не бил задоволен од динамиката на исплата. „Крајниот рок за исплата на грозјето од 2012 година е 30 април. За претходните години исплатата требаше да заврши до 5 март. Имаше тешкотии околу обезбедувањето на финансиските средства, такви се моите информации од винарската визба. Сега динамиката треба да се забрза, рече Димовски и најави дека ако се оддолжела исплатата од Министерството ќе преземеле дополнителни мерки. „Вистина е дека исплатата доцни и не се почитува докрај ветеното зашто требаше да заврши до петти овој месец. Но, исплата сепак има. Не сме задоволни од динамиката, но засега не можам да кажам што точно ќе преземеме за да извршиме притисок плаќањето на заостанатите обврски кон лозарите да се забрза. Конечната одлука ќе треба да се донесе на ниво на „Агротиквешија”, изјави минатата седмица Љупчо Аризанов, претседателот на регионалниот Сојуз на лозари „Агротиквешија”.

По двонеделни протести минатиот месец и блокирање на патот Неготино - Прилеп кај Росоман, лозарите и „Винеа” се договорија заостанатите долгови од откупеното грозје во изминатите три години да се платат до 5 март, а тоа од ланската реколта, да се исплати  најдоцна до 30 април оваа година.