ВИП го зголеми пазарниот удел на речиси 30%

Добивај вести на Viber

Мобилниот оператор ВИП во текот на 2013 година продолжи да расте  во сите сегменти од работењето, и покрај високо конкурентниот пазар во Македонија. Компанијата објави дека ја зајакнала својата позиција како втор мобилен оператор на пазарот и го зголемила својот пазарен удел на 28.0%. Вкупниот број на корисници на ВИП на крајот на 2013 изнесувал 630,000, од кои речиси половина или 47,5% се постпејд корисници.Приходите на компанијата се зголемени за 8% споредено со минатата година, и на крајот на 2013 година изнесувале 65 милиони евра. Заработката пред камати, даноци, депресијација и амортизација (ЕБИТДА) се зголеми за 20% и изнесува 15 милиони евра. „Зголемувањето на приходите јасно покажува дека понудите кои ги создадовме во изминатиот период беа во согласност со очекувањата и потребите на нашите корисници. Финансиската стабилност на нашата компанија ќе овозможи дополнителни можности за раст во период што следи. Растот на ЕБИТДА во 2013 година, ни дава цврста основа за продолжување на инвестициите на ВИП, кои ќе бидат во интерес на корисниците, но исто така и во насока на понатамошниот развој на пазарот на мобилна телефонија во Македонија“, изјави Питер Цидек, главен финансиски директор на Вип. „Ми претставува особено задоволство да потврдам дека нашите цели за 2013 година се во целост исполнети. ВИП успеа во релативно краток временски период да се зацврсти како втор по големина мобилен оператор и да обезбеди одржливост на операцијата во услови на високо конкурентен пазар. Очекуваме да продолжиме со одлични резултати и во 2014 година, бидејќи продолжуваме да ги остваруваме и надминуваме ветувањата дадени на нашите корисници“, истакна Никола Љушев, главен извршен директор на овој оператор. Во 2013 година, ВИП инвестираше 16 милиони евра, а 10.3 милиони евра во лиценца за 4Г. Во компанијата работат околу 340 лица. Сепак, и покрај позитивните резултати, од ВИП операторот велат дека пенетрацијата на мобилна телефонија на пазарот е намалена од 113% на 109% како резултат на конкурентните постпејд пакети кои ја намалиле потребата од СИМ картички од повеќе оператори.