Владата ќе финансира 400 нови бизниси со грантови
Објавено во: Економија 08 Јуни, 2015
Стартува вториот циклус со кој Владата планира да поддржи невработени лица.
Имено, со грант од по 201.000 денари се планира да бидат финансирани 400 нови бизниси, а за 32 најиновативни ќе им бидат доделени над 240.400 денари, а за оние 60 кои ќе докажат во нивниот бизнис план дека им е неопходно дополнително вработување за уште едно лице ќе им бидат доделени по уште 92.000 денари.
Вицепремиерот за економски прашања Владимир Пешевски на денешната прес-конференција во Владата истакна дека Владата работи за надминување на невработеноста, преку активна поддршка и нудење широк спектар на можности.
„Преку програмата за самовработување од 2007 до 2014 година се основани вкупно 6.775 бизниси со кои се обезбедени 6.885 нови вработувања“, рече Пешевски.
Напомена и дека за годинава за програмата за самовработување се обезбедени 202 милиони и 454 илјади денари од Буџетот на Владата со кои е планирано да бидат опфатени 960 невработени лица.
Спасов пак нагласи дека Оперативниот план за вработување директно придонесува за зголемување на вработеноста преку отворање можост невработените лица сами да си ја креираат иднината.
- Ова мерка има висок процент на успешност и преку 70 отсто од основаните бизниси се уште се активни. Преку 35 проценти, односно 2.426 од основачите на микробизниси преку Програмата за самовработување се жени, а 31 процент или околу 2.070 се млади претприемачи на возраст до 29 години, рече Спасов.