Владата ќе ја реконструира Палата АСНОМ за 5,7 милиони евра
Објавено во: Економија 27 Април, 2023
Владата за 5,7 милиони евра ќе ја реконструира Палата АСНОМ (поранешната зграда на Комерцијална Банка) која .сега не се гледа од кејот на Вардар во центарот на Скопје, затоа што е покриена од Археолошкиот музеј.
За оваа услуга на Бауер БГ ќе му бидат платени 405.684.000 денари со ДДВ. Според договорот, реконструкцијата треба да заврши за три години. Оваа зграда е во сопственост на Владата, а пред две и пол години таму изби пожар поради што Секретаријатот за европски прашања, Инспекторатот за животна средина и МИА требаше да се отселат во други простории.
„Објектот кој е познат во јавноста како старата зграда на Комерцијална Банка – Скопје пред реконструкцијата го користеа неколку државни институции, односно, Секретаријатот за европски прашања, МИА како и Инспекторатот за животна средина. Во тој контекст, сакаме да Ве информираме дека по завршувањето на реконструкцијата, Владата на Република Северна Македонија ќе донесе одлука кои институции ќе ги користат реконструираните простории на објектот“, ни одговорија од Владата на прашањето кои институции во иднина ќе го користат овој објект.
Според договорот, Бауер БГ ќе работи на рушење и демонтажа, монтирање, изолирање, ѕидарски и фасадерски работи, осветлување, електрична инсталација, лимарија, водовод, вентилација, противпожарна вентилација итн.
Покрај Бауер БГ, понуди доставиле и Жикол, АК-ИНВЕСТ и Штрабаг. Инаку Палата АСНОМ е несуденото име на зградата уште од времето на владата на Никола Груевски, но на палата никогаш не заличи. На 9 септември 2020 изгореа шест простории и документација.
А.К.