Владата нема да побара одговорност од Наумче Мојсовски

Добивај вести на Viber

Билјана Ивановска, претседателката на Државната комисија за спречување корупција, во емисијата „Топ Тема“ информираше дека нема изгледи за поднесување одговорност од страна на Наумче Мојсовски, директорот на Агенцијата за млади и спорт, по отворениот случај за бројни незаконитости во распределбата на парите преку т.н. спортски ваучери во износ од околу десет милиони евра на годишното ниво.

Владата до ДКСК, наспроти очекувањата на Антикорупциска, испратила покана од таму да делегираат претставник во група што ќе работи на подготовка на нов закон за спорт. Со работната група било прелдожено од Владата да раководи Мојсовски. 

– До кабинетот на вицепремиерката задолжена за политики за добро владеење Славица Грковска испративме иницијатива за утврдување одговорност, што значи за разрешување на директорот на Агенцијата. Испративме и кривична иницијатива до Јавното обвинителство, како и барање за засилени контроли до УЈП. Не добивме одговор. Но она што ни падна во очи е дописот кој неделава го добивме од Владата и со кој не задолжува да испратиме член во работната група за подготовка на нов закон за спорт и тоа во работна група која што ќе ја раководи директорот на Агенцијата. Гледајте го сега тоа. Дали треба коментар повеќе – рече Ивановска.

Комисијата иницираше кривично гонење на Мојсовски и на членовите на Централната комисија за евалуација на предлог-листите за доделување спортски ваучери на спортските федерации, клубови и поединци.