Владино роуд шоу во Калинград, руски тур-оператори ќе дојдат во Македонија

Добивај вести на Viber

По Естонија вчера, денеска инвестицискиот владин тим замина за Калининград каде и претстави потенцијалите за инвестирање и деловната клима во Македонија. На форумот во овој регион од Руската Федерација учествуваа претставници на компании од производниот сектор,  туризмот и земјоделството. Како што истакна македонскиот премиер Никола Груевски, Русија е значаен економски партнер на Македонија и нашата економска соработка и размена се постојано расте во текот на последната деценија. „Македонија ги укина визите за руските граѓани и може да дојдете во Македонија за да се уверите на дело во нашите поволности. Во Македонија има руски инвестиции како што се Протект груп, Солвеј груп, Лукоил, Гришко и од нив може да добиете потврда за можностите за водење на успешен бизнис во нашата земја“, повика Груевски. Тој ги повтори рангирањата на Македонија на листата на Светска Банка и Прајсвотерхаус куперс, што според Груевски е доказ за поволната бизнис клима. Претседателот на Асоцијацијата на инвеститорите на Калининград, Стефан Влаховиќ пак ги охрабри бизнисмените да ги истражат деловните можности што ги нуди Македонија. Во делот на туризмот исто така беше најавено дека повеќе тур-оператори од Калининград на 14-ти јули ќе ја посетат земјава за да видат што може да им понуди на руските туристи. Според вицепремиерот Владимир Пешевски, кој заедно до владиниот тим престојува во Калининград, ова е добра можност за Македонија. „Се договори посета на некои туристички компании и тур-оператори во Македонија. Дел од нив веќе носат туристи и најавија зголемвуање на бројот туристи во Македонија за оваа сезона. Постојат можности и во другите области, во делот на градежништвото, енергетиката, поради што очекуваме комплетни резултати“, изјави Пешевски.