ВМРО-ДПМНЕ го пушта низ вода Владимир Атанасовски

Добивај вести на Viber

Ниту синоќа ниту денес претпладне нема реакција од ВМРО-ДПМНЕ за доделениот 30-дневен притвор за екс-началникот на УБК, Владимир Атанасовски, кој беше наследник на Сашо Мијалков откако овој си поднесе оставка по пресметките во кумановско Диво Насеље во 2015-та.

Од ВМРО-ДПМНЕ за денеска најавија уште еден анти-владин протест, а лидерот Христијан Мицкоски на Фејсбук напиша дека причина за тоа е загадениот воздух и се што е „поврзано со промената на името и Уставот, одземањето на достоинството, упропастената економија, сиромаштијата, зголемувањето на даноците, неспособноста, криминалот и корупцијата и црнилата“.

Притворот беше одреден доцна синоќа од судија на претходна постапка по барање на Обвинителството. Мерката беше побарана откако тројца обвинети за упадот во Собранието на 27-ми април 2017 година сведочеа за инволвираност на Атаносовски заедно со други вработени во УБК во организирањето на упадот во Собранието. 

Обвинителката Вилма Русковска побара притвор за него по сите три основи: опасност од бегство, влијание врз сведоци и опасност од повторување на делото, но и најави проширување на истрагата. Адвокатот на Атаносовски смета дека Обвинителството не треба да им верува на луѓе на кои им се заканува доживотен затвор, но и дека треба да понуди конкретни докази и факти врз основа на кои околности ја докажува намерата за бегство или опасноста да се повтори делото, со оглед дека Атанасовски веќе едена и пол година не е директор на УБК.